Wednesday, October 15, 2008

تاكسي 1

الحقيقة مو عرفان منين بدي بلش المهم من هون لحتى اشتري سيارة رح تملو من قصصي مع شوفيرية التكاسي :
مشواري هالمرة من البرامكة باتجاه عين الفيجة يعني كنت عم قول بقلبي انشالله مايكون كتير غليظ الشوفير اللي بدي اطلع معو بهالمشوار البعيد نسبيا" 
ومن كتر معاناتي مع الشوفيرية صرت متلهن يعني الشوفير اللي مابيعجني ما بأشرله .
بس معلومكم بوقت عجقة الناس اضطريت اطلع مع احد الشبيحة طبعا بعد اخد ورد اتفقنا انو ادفع عداد و نص يلي مابيعرف ليش منقله انو لما بكون المشوار من الشام الى خارجها عادة بيطلب الشوفير عداد ونص خوفا من العودة بدون راكب ....... هلأ انو لازم اوصفلكن ياه و كمان وصف تصويري لعروسته عفوا سيارته : 
الشي المميز فيه هوضفر اصبع الخنصر .......اي لاتستغربو ضفر الخنصر طويل نوعا ما بطول الاصبع نفسه الظاهر الو استخدامات كتيرة احداها : 
تنظيف الاسنان .....حك الشعر ......الانف .....و غيره من الاستخدامات التي لايتسع المقام لذكرها الآن .
طبعا" لاننسى وجود 3 خواتم و هو الحد الادنى لكتير من شوفيرية التكاسي طبعا كل واحد بشكل مختلف دليل التميز و بالاضافة الى الشعر المسرح على طريقة مهند تبع نور  
طبعا الرجل فاتح كنزته ليفرجينا عضلات صدره .....نوع من الاستعراض امام الزبون بهدف الضبع و التخويف عندما تحين ساعة الحساب قصدي يعني وقت الدفع .طبعا لافي عضلات و لا شي فيك كمان تعمل درس تشريح على جسم هالعينتين 
البنطلون من نوع الكونز كالعادة 
اما الحذاء انتو اكبر قدر فهو شحاطة زنوبه تحررا" من حرارة الصيف .
اما السيارة اللي كان مكتوب عليها حبيبية ابو شادي فكانت مزدانة الصور الخاصة بصاحبنا السائق مع سيارته مع بوزات رهيبة بالاضافة الى صور النجوم و المشاهير من نجوى كرم مرورا بهيفا انتهاء باليسا ولا ننسى علي الديك طبعا يعني حسيت حالي قاعد بمعرض الهواء الطلق 
وبلش العينتين يسردلي قصص عن مغامراته مع النسوان اللي بيطلعو معه يعني حتى ظننت نفسي اتحدث مع ريتشارد غير من كتر افتتان النساء فيه وصده ورده ثم ابتلائه .....و كل شوي يغمز و يلمز و يلمح ......لحتى مل العينتين من هالسيرة .
وبلش يحكيلي على غلاء الاسعار و مواد البناء .......وصولا الى ظروفه المادية و كونه خريج جامعي اضطرته الطروف ان يعمل سائق تكسي و كم من مهندس و محامي يعملون شوفيرية تكاسي رح تصادف بعمرك الله وكيلكن من بين كل تلات شوفيرية تكاسي في اتنين شهادات عليا و التالت يمكن ماجستير استحيت قله انو صارت قديمة هالكذبة ........
هون بقا انا وصلت عل عين الفيجة و سكت شوفير التكسي عن الكلام المباح و غير المباح و هرولت الى حيث ينتظرني رفقاتي و انا عم قول بقلبي الله كريم بكره بشتري سيارة و بخلص من هالتعتيرة مع هيك امثال من الشوفيرية  
اصدقائي انا ما قصدي سيء لأصحاب هالنوع من المهن بس لما بكون الغالبية سيئة بكون الكلام بالعمو م و بيصير السوء هو الصفة المميزة لهيك نوع من الناس .

يتبع


1المثقف السوري

يا اصدقائي اولا لازم نصحح المصطلح ونقول المتثاقف السوري مابعتقد انو في اكتر من 5 بالمية من السوريين مثقفين هادا اذا كان بدنا نحكي عن ثقافة اما اذا بدنا نحكي عن التثاقف فهدول تقريبا 80 بالمية من السوريين هادا رأيي طبعا" و مظاهر التثاقف متعددة منها 

لازم تحبو لنزار قباني كيف لكان والا انت متخلف و جاهل وهون مابتشفعلك شهادتك الجامعية بالادب العربي ابدا وبالتالي كونك مثقف و حبك لنزار قباني شيئان متلازمان و أنا ضد هالحكي القضية قضية تذوق ادبي بحت .

فيروز صوتها حلو بس انا مو من معجبينها انا من معجبين نيللي مقدسي وا ذا هالشي بيتعارض مع كوني مثقف فانا بختار نيللي.........يعني مابيمنع ابدا كون مثقف و حب اسمع لهيفا او نوال........أو فيروز 

اذا قبلنانسمي اللي عم نشوفه  ثقافة فهيي الصراحة ثقافة جرايد و قد تصل الى الكلمات المتقاطعة .......باحدى درجاتها 

كمان في شي اسمه عقدة الآخر و بينتج عنها مرض الفهمنة (نوع من انواع التثاقف ) وهي مثال : 
انت مهندس مثلا (متل حالاتي ) و قاعد مع واحد مالو علاقة بالهندسة يعني شوفير تكسي مثلا (مع احترامي الشديد لكل المهن باستثناء 90 بالمية من شوفيرية التكاسي ) بيبلش يحيكلك عن مهنتك و يتفصحن و يعطي نصائح كمان و اذا كان في اكتر من واحد بالجلسة لازم اكيد يحرجك ....يعني بيدعي انو بيعرف كل شي و قس عل ذلك .......

يمكن كتير دخلت نسب و رياضيات بتعليقي بس هادا لاني متثاقف سوري بأحيان كتيرة .........المرض فينا كلنا 
ماسألتوني عن الـ 15 بالمية الباقيين من السوريين ........هدول ماالهن  تصنيف او بالأحرى من عالم مافوق الثقافة لم يكتشف بعد
يتبع